गढ़वाली कविता- उत्तराखण्ड
====================
टिहरी की नत्थुलि ,
अल्मोडा की बाल मिठै छ
सिराईं पुरोला कु लाल नाज चौंळ छ उत्तराखण्ड….
हर्षिल टकनौर क सेब और राजमा छ
गंगा जमुना कु मैत छ
जागर छयूड़ा-पवाडा रासू-तान्दि छ
सेम नागराजा भैरव मां नन्दा कु वास
शिव पार्वती कु वास छ उत्तराखण्ड
रामी बौराणी;
तीलू रौतेलि कु मान छ
हरा भरा सैणा बुग्याळ छ
गढवाल कुमौ रवांई सलाण जौनपुर
गंगाड सलाण टकनौर
दशगी हातड़ भण्डारस्यूं बिष्ट पट्टी
पालीगाड बमुण्ड पट्टी छ
गढवाल कुमौं जौनसार छ उत्तराखण्ड
तिलाडी शौर्यगाथा छ
भारत मां कु माथा छ
इगास मंगसीर बग्वाळ छ
जीतू बगड्वाल
राणा गम्भीरु नरु विजुला भड़ु
की गाथा छ उत्तराखण्ड
गंगोत्री-यमुनोत्री
पंच बद्री पंच केदार पंच प्रयाग छ
चिपको आन्दोलन छ
मौलाराम गढवाली
चित्रकार छ उत्तराखण्ड
देवी देवतौं का भूमि छ घुघति घुरान्दि छ
हिलांस बासदि छ वेद पुराणों कि रचना ह्वै
ॠषि मुनियों की तपोभूमि छ
भारत मां कु शीष हिमालै छ उत्तराखण्ड
पाण्डवों कु स्वर्गारोहण छ
सुमित्रानंदन पन्त कु कौसानी छ
हेमवतीनन्दन बौगुणा कु पौड़ी छ
बुरांश चुळू अखोड़ छ
कमलाराम नौटियाळ कु संघर्ष छ
श्रीदेव सुमन की गाथा छ उत्तराखण्ड
हमारु मान सम्मान छ
बद्री विशाल अखण्ड जोति छ
शंकर-परशुराम जी कु वास छ
उचि निसि डांडि काण्ठि
खाळ धार छ उत्तराखण्ड
बीरु भड़ु कु देश छ
बावन गढ़ु कु देश छ
हरा भरा सैणा बुग्याळ छ,
रुपनौला कु सौड़ छ
मौलाराम गढवाळी चित्रकार छ
कवि कालिदास की
जन्मभूमि छ उत्तराखण्ड
-रामचन्द्र नौटियाल
9997976275
Ramchandranautiyal123@gmail.com
